អង់គ្លេស៖ ក្លិបបាល់ទាត់ Manchester United ​បានប្រកាសដំឡើងថ្លៃសំបុត្រទស្សនាក្នុងមួយរដូវកាលសម្រាប់មនុស្សពេញវ័យ ក្នុងចំនួន ៥ភាគរយនៃតម្លៃដើមចាប់ពីរដូវកាលបន្ទាប់ ខណៈដែលក្លិបមិនបានដំឡើងថ្លៃសំបុត្រទស្សនាការប្រកួតចំនួន ១១រដូវកាលកន្លងមកហើយ។ នេះបើតាមសេចក្តីប្រកាសផ្លូវការរបស់ក្លិបកាលពីថ្ងៃចន្ទ។  

ការប្រកាសដំឡើងថ្លៃសំបុត្រនេះត្រូវបានក្លិបអះអាងថាដោយសារតែការចំណាយសម្រាប់រៀបចំការប្រកួតនីមួយៗមានការកើនឡើង ដែលការកើនឡើងនេះមានទំហំប្រមាណ ៤០ភាគរយក្នុងរយៈពេល ៥ឆ្នាំចុងក្រោយ និងកើនឡើងការចំណាយរហូតដល់ ១១ភាគរយត្រឹមរយៈពេល ១២ខែប៉ុណ្ណោះ។ 

ក្នុងសេចក្តីប្រកាសផ្លូវការក្លិបបានបញ្ជាក់ថា ការកើនឡើងតិចតួចនៃតម្លៃសំបុត្រសម្រាប់រដូវកាល ២០២៣/២៤ ខាងមុខនេះគឺមានភាពចាំបាច់ដើម្បីឱ្យក្លឹបដំណើរការលើមូលដ្ឋានប្រកបដោយនិរន្តរភាព។ ក្លិបបានព្យាយាមរក្សាការកើនឡើងតម្លៃយ៉ាងល្អឱ្យស្ថិតនៅក្រោមអត្រាអតិផរណាបច្ចុប្បន្ន ទាំងតម្លៃសំបុត្រទស្សនាការប្រកួតនៅ Old Trafford រួមជាមួយនឹងតម្លៃអាហារ និងភេសជ្ជៈក្នុងថ្ងៃប្រកួត នឹងបន្តស្ថិតក្នុងកម្រិតតម្លៃសមរម្យបំផុតមួយ បើប្រៀបធៀបជាមួយក្លិបនៅក្នុងក្របខណ្ឌ Premier League ផ្សេងទៀត។

បន្ថែមពីលើនេះ ក្លិបបានប្រកាសថាក្លិបនឹងនៅតែបន្តរក្សាតម្លៃដដែលសម្រាប់សំបុត្រទស្សនាការប្រកួតរបស់អ្នកគាំទ្រដែលមានវ័យក្រោម១៦ឆ្នាំ និងតម្លៃសំបុត្រសម្រាប់កុមារ និងដោយឡែកក៏មានការបញ្ចុះតម្លៃចំនួន ៥០ភាគរយសម្រាប់ទស្សនិកជនដែលមានអាយុលើសពី ៦៥ឆ្នាំ។ បច្ចុប្បន្នក្លិប Manchester United ដែលកំពុងកាន់កាប់ដោយគ្រួសារមហាសេដ្ឋីអាមេរិកត្រកូល Glazer កំពុងតែត្រូវបានដេញថ្លៃដោយមហាសេដ្ឋី Jim Ratcliffe ម្ចាស់ក្រុមហ៊ុន INEOS ដ៏ធំរបស់ចក្រភពអង់គ្លេស ក៏ដូចជាសំណើពីមហាសេដ្ឋីកាតា លោក Sheikh Jassim Bin Hamad Al Thani ជាកូនប្រុសអតីតនាយករដ្ឋមន្រ្តីកាតា៕